ПОТАПОВ ЮРИЙ ВАСИЛЬЕВИЧ - САРГЫН
(1941-2019 сс.)
төрөөбүтэ 80 сылыгар аналлаах
виртуальнай быыстапка
Үйэлээх биһигим
Сахалыы тылынан сааһылаан саҥаран
Бу көстөр кэрэни, оо, күүскэ туойдарбыан!
Эппиттэн-хааммыттан иэйэммин-куойаммын
Эгэлгэ тылынан эҥсэммин эттэрбиэн!
Юрий Васильевич Потапов-Саргын 1941 сыллаахха Нам улууһун Арбын нэһилиэгин Кириэстээҕэр колхуостаах дьиэ кэргэнигэр төрөөбүтэ.
Арбын, Хатырык, Хамаҕатта оскуолаларыгар үөрэнэн, Бүлүүтээҕи педучилшцеҕа 1962 сыллаахха үөрэнэ киирбитэ. Ити сылларга Хатырыкка уонна Хамаҕаттаҕа К.П. Яковлева тэрийбит, онтон педучилищеҕа Н.П. Дмитриев салайбыт литературнай куруһуоктарыгар сылдьан уус-уран тыл кистэлэҥэр уһуллубута.
Үөрэҕин 1966 сыллаахха бүтэрэн, Искра начальнай оскуолатын сэбиэдиссэйинэн, учууталынан ананан үлэлээбитэ. Онтон 1968 с. Фрунзе начальнай оскуолатыгар директорынан, учууталынан ананан, биир сыл үлэлээн баран, 1969 с. алтынньытыттан комсомольскай тэрилтэ босхоломмут секретарынан талыллан М. Аммосов аатынан колхуоска 1971 сыллаахха диэри үлэлээбитэ.
1971 сыллаахха аҕата ыалдьан Арбыҥҥа оскуола директорынан, учууталынан ананар. 1976 сыллаахха балаҕан ыйыттан Госстрах агенынан үлэлиир. 1991 с. Госстрах штаты таһынан агенынан үлэлээн, онтон сааһынан пенсияҕа тахсан уурайбыта. 1994-1997 сс. землеустроителинэн үлэлээбитэ.
СР Суруйааччыларын сойууйун, «Отуу уота» литературнай түмсүү чилиэнэ. Хас да кинигэ ааптара. Нам улууһа, Хатыҥ-Арыы, Ленскэй, Арбын нэһилиэктэр бочуоттаах гражданина.
"Киһиэхэ түргэнник тиийимтиэ, өйдөнүмтүө, ырыа курдук тахсан иһэр хоһооннору айыы - бэйиэт улахан дьоло, үрдүк ситиһиитэ, өлбөт-сүппэт анала, олоххо төннөн кэлиитэ..."
Александр Дунаев
