НАМЫМ САЛААТА

Ржев куораты босхолуурга сырдык тыыннара быстыбыт

Намым буойуттарыгар аныыбын

 

Ржев куораты, герой куораты

Босхолуур кырыктаах кыргыһыыга,

Эн баарыҥ — саха буойун саллаата

Өстөөхтөн көмүскүүр инники кирбиигэ.

Бааллара саллааттар —

                           Алдантан, Ньурбаттан,

Дьокуускай куораттан,

                           кытыы да сирдэртэн

Бааллара дии... Бу мантан —

                           мин Намым сириттэн,

Энсиэли эҥэрин эдэркээн дьонноро.

Ол уоттаах сэриигэ,

Эн Намым саллаата

Күүстээх-уохтаах модун санааҕынан,

Олоҕу анаарар муударай толкуйгунан,

Инники кирбиигэ

                           кимиэллээхтик киирбитиҥ.

Хас куорат, хас село сибиниэс ардаҕар,

Түннүктүүн - үөлэстиин

                           түллэҥниир кэмигэр,

Эн Намым саллаата, хорсуннук охсуһан

Кыайыыга өрөгөй үөрүүтүн сахпытыҥ!

Үйэ-саас тухары ол онно хаалтара

Ол улуу геройдар, ол олох үөһүгэр,

Кинилэр ааттара, үйэттэн үйэҕэ

Аттана туруоҕа, күн сирин үрдүгэр.

Кэриэс тыл этээри, ол буойун уҥуоҕар,

Бараллар Ржевкэ буойуннар сиэннэрэ

Үлэҕэ, үөрэххэ инники сылдьарга,

Олоҕу түстүүргэ андаҕар этэллэр!