ОЛОҔУМ ТУҺУНАН КЫЛГАСТЫК

(Анна Парникова - Сабарай Илгэ автобиографията)

​

1959с. муус устар ый 17 күнүгэр Уус - Алдан Суоттутугар төрөөбүтүм. Ийэм - Нам Торуой Хомустааҕыттан төрүттээх физика, математика учуутала Парникова (кыыс эрдэҕинээҕи араспаанньата Юшкова) Мария Спиридоновна, аҕам - Суотту олохтооҕо агроном идэлээх Парников Алексей Николаевич.Үс саастаахпар дьоммунуун Нам Бартыһааныгар көһөн кэлиэхпиттэн ыла, манна олоробун.Кырабар икки хараҕа суох ийэбинэн эһэм Юшков Спиридон Михайлович - Оҥхоот оҕонньор олоҥхотун, остуоруйаларын, үһүйээннэрин эҥин истэн улааппытым. Ааҕар буолуохпуттан, оччолорго үгүөрүтүк бэчээттэнэр чэпчэки сыаналаах хоһоон кинигэлэрин, атын да сахалыы, нууччалыы айымньылары аҕабар үлэһэн ылларан ааҕа-ааҕа хайдах маннык дьикти үчүгэйдик тылы дьүөрэлээн, наардаан суруйалларый диэн, сөҕө, ымсыыра саныыр буоларым. Бастакы хоһоонум аата «Хатыҥчааным барахсан» диэн этэ, дьиэбит таһыгар аҕалан олордубут хахыйахпытыгар анаммыта. Оскуолаҕа үөрэнэ сылдьан кэлин да ыытар хоһооннорбун биирдиилээн эмэ оройуонум хаһыата бэчээттиирэ.1976 с. Суотту орто оскуолатын бүтэрэн баран, дойдубар Бартыһааҥҥа сопхуоска үлэлээбитим, эмиэ да соҕуруу куораттарга үөрэнэ сылдьыталаабытым. Онтон дьэ 1986 с. сайын ахтылҕаннаах Сахам сиригэр букатыннаахтык төннөн кэлбит үөрүүбүттэн төлө көтөн тахсыбыт хоһооннорум улахан бөлөхтөрүн бэйиэт, эрэдээктэр Николай Рыкунов «Ленин суола» хаһыатыгар бэчээттэппитэ. Ити кэнниттэн «Эдэр коммунист» хаһыаттан аҕабар эрэдээксийэтин сорудаҕынан кэлэ сылдьар суруйааччы, суруналыыс Прокопий Чуукаар түбэһэ түһэн хоһооннордоох тэтэрээппин ылан илдьэн, хаһыатыгар таһааттарбыта, онтон кэлин 1992с. «Куйаас сайын» диэн ааттаах кинигэ гынан бэлэмнээн бэчээттэппитэ. Иккис «Күн баҕам» диэн сүрэхтэммит кинигэбин бэйиэт Моисей Ефимов көрөн - истэн, биэбэйдээн күн сирин көрдөрбүтэ.

Онон ити үс киһи мин айар үлэм аҕалаатар аҕалара, үтүө төһүүлэрэ буолаллар. Биэнсийэҕэ тахсыахпар диэри, сопхуоска үлэлээбитим. Кэлин ыалдьан дьиэбэр олоробун, кэлиҥҥи хоһооннорбун бэчээккэ бэлэмниибин.

Хоһоонунан бэйэм олох, өлүү, дьол, сор уо.д.а тустарынан санааларбын чопчулаан этэ сатыырга кыһанабын.

 

«Бичик» кинигэ кыһатыгар, чуолаан дириэктэр Егоров Август Васильевичка, эрэдээктэр Людмила Алексеевна Федороваҕа, «Күһүҥҥү ыһыаҕым» кинигэм тахсарыгар ис сүрэхтэриттэн кыһаммыт, сүүрэн - көтөн көмөлөспүт дьоҥҥо: Саха Өрөспүүбүлүкэтин Суруйааччыларын түмсүүтүн салайааччытыгар Мигалкин Иван Васильевичка, истиҥ дьүөгэбэр поэтесса, литэрэтиирэ кириитигэ Томская Галина Егоровнаҕа - Айыынаҕа, хоһооннорбун бэчээттээбит Винокурова Мария Григорьевнаҕа, кийииппэр Надежда Анатольевнаҕа, бииргэ төрөөбүттэрбэр Антонинаҕа, Николайга, Варвараҕа, кинилэр дьиэ кэргэттэригэр - бука барыгытыгар барҕа махталбын кытары байдам алгыспын ыытабын. Аны да айар баҕалаахтарга кыраҕы харахтаныҥ, суруйар соруктаахтарга сылаас сыһыаннаныҥ, саха суруга - бичигэ сайда - чэчирии турарын туһугар!

 

Парникова Анна Алексеевна - Сабарай Илгэ, поэтесса

​

Убаастабыллаах Иван Васильевич!

​

«Күһүҥҥү ыһыаҕым» кинигэм тахсарыгар ис сүрэххиттэн кыһанан, сүүрэн - көтөн көмөлөспүккэр барҕа махталбын кытары, байдам алгыспын ыытабын. Аны да айар баҕалаахтарга кыраҕы харахтаныҥ, суруйар соруктаахтарга сылаас сыһыаннаныҥ, саха суруга - бичигэ сайда - чэчирии турарын туһугар!

​

                                                                                            Парникова Анна Алексеевна - Сабарай Илгэ

 

 ​