КИЭН ТУТТАР КИҺИБИТ

 Мин оскуолаҕа үөрэнэр эрдэхпиттэн Афанасий Андреевич Протопоповы син элбэхтэ көрөрүм эрээри кини туһунан билбэт этим. Кинини үчүгэйдик 1980 сыллаахтан ылата билэр буолбутум. Оччолорго эдэр, активист киһи комсомольскай тэрилтэ секретара буола сылдьыбытым, райкомол бюротын чилиэнинэн талбыттара, коммунистическай партияҕа чилиэнинэн ылбыттара, онтон партия райкомун бюротын чилиэнэ буолбутум. Ити кэмнэргэ комсомольскай уонна партийнай хайысхаларынан үлэ ыыта сылдьан Афанасий Андреевичтыын син элбэхтэ алтыспыппыт. Онон аҕа дойдуну көмүскүүр сэриигэ кыттыбытын, дьиэ кэргэнин билбитим уонна кинини, кини доҕотторун, оҕолорун кытта элбэх тэрээһиннэргэ көрсөрбүт. Афанасий Андреевич куруутун наҕыл соҕус буолааччы, ханна эрэ ыксыы аҕай сылдьарын көрбөтөҕүм. Тыл эттэҕинэ эмиэ ыксаабакка саҥарара. Ордук сөбүлээбитим диэн кини олус эйэҕэстик көрөрүн, мичээрдиирин, ханнык эрэ түгэҥҥэ туох эмэ дьээбэлэһиигэ истиҥник күлэн ыларын. Партия чилиэнэ буолан хойукка диэри общественнай, ветеранскай сорудахтары толоро сылдьарын, комиссияларга наҕыллык үлэлии олорорун астына көрөрүм.

 Культура отделын сэбиэдиссэйинэн 1996 сыл күһүнүгэр үлэлии кэлэн баран урут кимнээх улуус культуратын салайбыттарын билбитим. Онно 1959 сылтан 1968 сыллааха диэри, биир кэмҥэ барыларыттан уһуннук – 9  сыл устата Афанасий Андреевич салайан кэлбит этэ. Кэргэнэ уонна икки кыыһа эмиэ культура тэрилтэлэригэр үлэлээн ветеран буолбуттара. Кини киһи быһыытынан олус ытыктанар этэ, билигин даҕаны кини аатынан биһиги киэн туттабыт, олоҕун оҕолоро, сиэннэрэ уонна хос сиэннэрэ салҕыыллар. Афанасий Андреевич туһунан кинигэ тахсарын истэн олус үөрбүтүм уонна Евгения Афанасьевнаны үчүгэйдик билэр буоламмын бу кинигэ аҕатын туһунан дириҥ ис хоһоонноох уонна эдэр ыччаты иитигэ туһалаах буолуо дии саныыбын.

 

А. В. Кириллин, М. К. Аммосов аатын сүгэр Саха Республикатын государственноһын историятын Өрөспүүбүлүкэтээҕи музейын салайааччыта.